- الأحد، ١٣ يوليو ٢٠٢٥
- إتصل بنا
كتبت سماح إبراهيم
لو نفسك تعملي وصفة فراخ جديدة ومليانة نكهات تخطف قلب كل اللي يدوّقها، يبقى لازم تجربي الفراخ بالبصل والفلفل على الطريقة البيتي الأصيلة، اللي هتخلي سفرتك مليانة ريحة وطعم ولا أروع!
المكونات:
فرخة وزنها كيلو ونص مقطعة على حسب الرغبة
٤ بصلات كبار متقطعين مكعبات
٢ فلفل رومي (أخضر أو ألوان حسب المتاح)
٢ طماطم متقطعين مكعبات
ملح، فلفل أسود، سماق
معلقة كبيرة سمنة
معلقة صغيرة سكر
ورق لورا، حبهان
ربع كوب ماء ساخن
فحمة (اختياري للتدخين في النهاية)
الطريقة:
1. في بولة كبيرة، اخلطي البصل مع الملح والفلفل الأسود والسماق كويس جدًا لحد ما يطرى وياخد طعم التتبيلة.
2. ضيفي الفلفل والطماطم وقلّبيهم مع البصل.
3. على النار، في صينية أو طاسة غويطة، حطّي معلقة سمنة مع معلقة سكر، وورق اللورا والحبهان، وسيّبيهم يسخنوا لحد ما الريحة تطلع.
4. نزّلي الفراخ وخليها تاخد لون ذهبي من كل الجوانب، بعدين طلّعيها على جنب.
5. في نفس الصينية، ضيفي خلطة البصل وشوّحيها شويّة لحد ما تبدأ تدبل.
6. رجّعي الفراخ فوق الخلطة، وضيفي ربع كوب ماء مغلي، وغطي الصينية كويس.
7. دخّليها الفرن على حرارة متوسطة، ولما تستوي، شغلي الشواية شوية علشان تحمّر من فوق وتاخد لون حلو.
8. ولو حابة، طشيها بفحمة مولعة في طبق صغير جوا الصينية وغطيها دقيقتين علشان تاخد طعم الشوي المدخن.
جربيها ومش هتبطلي تعمليها، واللي يدوقها هيفتكر إنك محترفة طبخ على أصوله!
التعليقات الأخيرة