الزحمة بتدوس ع الشارع
الشاعر محمد سعفان
الزحمة بتدوس ع الشارع
والشارع بيحاول يثبت
ف مكانه
ورصيفه بيدحرج ع الجمب التاني
والناس بتعاني
اسعار السوق
والواد مزنوق
بين التوكتوك والحيطة
والبنت اليطة
واقفة بتتأفف
والراجل بيخفف
سعر القوطة
والناس بصاله
اصله بيسرق ف ميزانه
والراجل علي باب دكانه
بيمشي الواد اللي
اتخرج م الجامعة
وبيبيع مناديل
اصله عويل
كان عايز يبقي موظف
ف وظيفه
لكن الناس الحريفة
راكبين ع الموقف
بالوسطة وبالفكة
والواد عايز تكة
يتجوز ويجيب ولدين
ويجيبهم ليه
وابوه مش بيه
باع عمره ف تعليمه
وطلع بارع
واترمي ف الشارع
.
التعليقات الأخيرة