- الجمعة، ١٣ مارس ٢٠٢٦
- إتصل بنا
حنان محمد ، ام معيلة من محافظة القاهرة ، سوف يتم تكريمها من مبادرة بداية جديدة للتأهيل النفسى للمطلقة وابنائها ودعم المرأة المعيلة باحتفالية يوم المرأة المعيلة للسنة السادسة فى خلال شهر مارس
حنان محمد ام معيلة من محافظة القاهرة ، تروى لنا قصتها وتقول :
قصتى بدأت لما كنت في ثالثه اعدادي لما كان نفسي اطلع دكتوره حلم كل بنت لكن الحظ مساعدنيش كنت شاطره وبحب المذاكره لكن امى وقعت على رجلها وبما انى البنت الكبيره انا اللى شيلت البيت وكان ليا اخ لسه مولود عنده ٣ شهور شيلت البيت وخدمت امى وذاكرت لكن المجموع طلع قليل دخلت ثانوى فنى قولت احاول احقق حلمى واذاكر واعوض ذاكرت واجتهدت لحد ما طلعت من العشره الاوائل على المدرسه فى ثالثه ثانوى فنى وقولت ادخل كليه هندسه لكن وقفت معايا على درجتين مكنش ليا حظ واتخطبت واتجوزت ولكن الجوازة فشلت .
واتطلقت وانا عندى ١٩ سنه بعد ٤ شهور بعد معاناه وتعب وبهدله شوفت فيهم ايام وحشه وقعدت سنتين رافضه الجواز لحد ما جت فرصه انى اتجوز واحد معاه ٣ اولاد بنت وولدين امهم متوفيه وكانوا سن ٦و٧و٣ سنين ربيتهم وحملت بابنى بعد سنه من الجواز وقدمت على شغل بالدبلوم وكان ليا نصيب وقبلت ف الوظيفه قبل مااولد بشهور وولدت ابنى وعيشت ايام مع خدمه خمس اولاد وزوج وبيت وشغل وخلصت مؤهل ليسانس حقوق وبعد كدا ربنا كرمنى بابنى الصغير اصبح عدد الاولاد ٦ ربنا يخلى ووالدهم وعرفنا بعد مرض زوجى بالصدفه ان جوزى مريض كانسر والمرحله الاخيره وكل الدكاتره اجمعوا انه مش هيستجيب للعلاج لكن انا اصريت انى اروح معهد الاورام .
وفضلت معاه وواقفه جنبه واغيب من شغلى وكان بياخد كيماويّ ونطلع ٦ الصبح نرجع ٦ المغرب يومين ف الاسبوع ووقتها كان ابنى الصغير مرحله الشهور وفضلت جنبه لحد المعهد ماقال خديه واستنى قضاء الله قعدنا ف البيت ف انتظار القدر بعدها ب ٤ شهور انتقل الى رحمه الله فى عام ٢٠١٦ كان اعمار اولاده الكبار تقريبا ٢٢و٢٣ و١٩ وكان اعمار اولادى الصغيرين ١٢و٩و ١ ونص ابنى الصغير قعدت بعد وفاه والدهم معاهم بمرتب وظيفتى بصرف عليهم السته منهم الاولاد الكبار كان والدهم فاتح ورشه دوكو سيارات ..
بشتغل الصبح ف الوظيفه باحث قانونى من ٨ ونص لحد ٢ونص اروح اجهز الغداء وبالليل ف مكتب محامى من ٧ لحد ١١ بالليل علشان مفيش معاش لابوهم لانه مكنش متأمن عليه واولادى اصبحوا الكبير ف اولى جامعه الكليه التكنولوجيه للعلوم والطاقه بالفيوم وبنتى ف ثانيه اعدادى وابنى الصغير ف ثالثه ابتدائى والحمد لله اولاد زوجى الكبار ربنا كرمهم اللى خطب واللى اتجوز وانا معاهم إلى الآن ربنا يبارك فى اولادى الستة يارب
التعليقات الأخيرة