آخر الأخبار>> ( منوعات )

البطلة ناهد رمضان ام معيلة من محافظة القاهرة .. أعرف التفاصيل|كاريزما ناين

ناهد رمضان ، ام معيلة من محافظة القاهرة ، سوف يتم تكريمها من مبادرة بداية جديدة للتأهيل النفسى للمطلقة وابنائها ودعم المرأة المعيلة باحتفالية يوم المرأة المعيلة للسنة السادسة فى خلال شهر مارس ناهد رمضان ، ام معيلة من محافظة القاهرة ، تروى لنا قصتها وتقول : انا اسمي  ناهد رمضان الشهيره بام احمد .. انا ام عاديه زي اي ام تزوجت والد اولادي خلفنا ثلاث اولاد احمد ويوسف وريتاج الصغيره مرت حياتنا عاديه خالص زي اي عيله الا فجاه مرض ابو الولاد تعب جدا فتره  ودخل المستشفى وتوفاه الله ، كان لسه احمد ابني في سنه سته ابتدائي ويوسف كان كان لسه ما دخلش المدرسه وكانت ريتاج الصغيره لسه تقريبا عندها ثلاث سنين .. احمد ابني الكبير اتولد  طبيعى  احمد اول ما اتولد كان لغايه سن ثلاث سنين ونص اربعه مش بيتكلم خالص  ومنطوي ودايما قاعد لوحده فجيت لما دخلته المدرسه ست سنين الابتدائي المدرسه قالت لي ابنك ده مش زي بقيه الاولاد هو ليه قاعد على طول لوحده وليه ما بيتكلمش زي العيال قلت لها ما اعرفش قالت لي حتى لما بيجي يقعد في المدرسه مش متجاوب ولا بيعرف يقرا ويكتب زي بقيه الاولاد قلت لها لانه هادى قالتلى لازم  تروحي تكشفي على الولد ده في المستشفى فعلا رحت كشفت عليه في المستشفى وعملنا رنيين على المخ  قالوا لي ابنك عنده بؤرة صرعيه في المخ ودي عامله له تاخر و مع الوقت هتسبب له تشنجات ثاني استغربت قلت له كنت اول مره اعرف يعني ايه بصورة صرعية  قلت لهم طب والحل ايه قالوا لي الحل روحي اعملي له اختبار ذكاء . وفعلا عملنا اختبار ذكاء و دخلنا ف رحلة جلسات التخاطب وتنمية المهارات ف المستشفيات . فنصحوني قالوا لي طالما هو كده اعملي له دمج تعليمي علشان الولد كده مش هيعرف يتوافق مع الولاد الثانيين فعلا عملت له دمج تعليمي وكده عملته له هو في سنه ثالثه ابتدائي بعد كده في اول دخول سنه سته ابتدائي والده توفى الله يرحمه ودي كانت بالنسبه لنا صدمه طبعا وبنسبه لاحمد بالذات صدمه كبيره جدا الولد  اثرت على نفسيته جدا .  وابتدينا بقى  رحله الوحده كنت انا واولادي كلنا عايشين في اوضه واحده . فالوضع ده بعد الاولاد كبرت شوية كان صعب  مكنوش  بيعرفوا يلعبوا زي الولاد التانيبن محبوسين في الاوضه اللي فيها اكلنا وشربنا ونومنا والترفية  بتاعهم طول اليوم قدام التلفزيون كل حاجه كانت في اوضه واحده فطبعا ده اثر على نفسية الاولاد خلاهم انطوائيين . المهم في وسط كل ده في اليوم ال 40 بالظبط من وفاة باباهم ريتاج الصغيرة وقعت من على السرير جريت بيها على الصيدليه البنت عينيها احولت ولونها ازرق وشكلها بقى غريب رحت الصيدليه الدكتور قال لي بسرعه اجري على اي مستشفى علشان البنت يتعمل لها اشعه مقطعيه على المخ فعلا روحنا  على مستشفى في شبرا عملوا على البنت اشعه على المخ قالولي البنت عندها كيس ميه على المخ وتركيز الكيس على بؤره التركيز اللي في المخ فهيعمل للبنت تاخر بسيط وهيخليها ما بتركزس قلت له طب يا دكتور نعمل ايه قال لي كل سنه تيجي تعملي اشعه نشوف كيس الميه ده بيكبر ولا بيضمر قلت  طيب يا دكتور .. تاني سنه رحنا لقينا الكيس بيكبر بس بسيط سألته طب يا دكتور احنا الحل ايه ممكن نعمل للبنت عمليه ونشيل كيس الميه ده قال لا طبعا ما ينفعش العمليه خطيره ومش مسؤولييتى يعني  ممكن تفشل وممكن تنجح لكن هي تعيش بالعلاج وكل فتره نعمل لها اشعه مقطعيه على المخ ونشوف حجم الميه والكيس بيكبر ولا ايه لكن هي لو لو البنت هتفضل كده هو هياثر على تركيزها وفعلا البنت دلوقتى  مش زي او اصحابها في المدرسه خالص البنت بتنسى ضعيفه جسمانيا وضعيفه دراسيا فطبعا انا مش قادره يعني مش قادره اوديها لمدرسة خاصة تراعيها بحالتها دى قررت اسيبها ف مدرسة حكومية و طبعا قلقانة جدا انى اسيبها كده بس انا اعمل ايه خايفه من العمليه جدا ونسبه النجاح فيها ضعيفه جدا سلمت امري لله وبتاخذ علاج ولله الامر من قبل ومن بعد وبقيت بدي علاج المخ والتشنجات والنوبات الصرعيه لاحمد وبدي لريتاج الادويه بتاعه ميه كيس المخ والتركيز في وسط كل ده لقيت يوسف ابني بيخس يوسف ده الوسطاني لقيته بيخس وما لوش نفس للاكل وعلى طول نايم نايم فقلت الولد ماله كده يعني الدنيا مش  مظبوطه مش بيجري ولا بيلعب زي العيال اللي في سنه رحت  المستشفى عملوا له شويه تحاليل وكده قالوا لي الولد عنده سكر انا ساعتها الدنيا يعني اسودت في وشي يعني انا كان كل املي في ربنا ان هو يخلي لي يوسف ده يبقى سند لاخوه الكبير التعبان واخته الصغيره التعبانه ما كنتش متوقعه خالص يعني استغفر الله العظيم ان يوسف يجي له السكر . والله ما لاقيت غير انى فضلت احمد  ربنا  على الابتلاء وقلت يارب خليهملى و احفظهم وبقيت اصرف بعض الأدوية من التأمين و بعضها ياتى لنا من ولاد الحلال ولله الحمد و فى وسط الضلمة بيظهر النور و الحمد لله ربنا كرم احمد ابنى الكبير التحق بمركز شباب الجزيرة و بيلعب ف فريق كرة القدم و الحمد لله حصلوا على بطولة الجمهورية و حصلوا على كأس مصر ف كرة القدم و ربنا كرمنى و اختاروه ف فريق كورال الاتحاد المصرى للاعاقات الذهنية وغنى ف حفلة قادرون باختلاف أما السيد رئيس الجمهورية وبيشتغل اشغال يدوية سجاد و بامبو و شاطر فيهم جدا ولله الحمد و هو السنة دى ف ثالثة ثانوى علمى علوم و ربنا يفرحنى بنجاحة والحمد لله دى حكايتى مع اولادى ربنا يقوينى و يعينى اقدر اكمل رسالتى ف الحياة ودعواتكم ...