- الاثنين، ٢٠ أبريل ٢٠٢٦
- إتصل بنا
إعداد وتقديم//مرفت عبدالقادر احمد
هتجيبى لتر ميه وضيفى عليه 2 معلقة صغيرة ملح و2 معلقة كبيرة سكر.
دوبى الملح والسكر كويس انزلى بيهم على 2 كيلو دقيق .
أعجنى لمدة 10 دقايق لو العجينة احتاجت ميه ضيفى شوية بشوية لحد ما تجمعى العجينة قطعيها على 6 كور وغطيها وسيبيها تريح ساعة هتقولى مفهاش خميرة هقولك كل ما تريح تتفرد أسهل معاكى .
هاتى نص كيلو من الزبدة أو السمنة وضيفى عليها معلقة صغيرة بيكنج بودر هتخلى الفطير يورق معاكى .
ادهنى الرخامة أو ترابيزة المهم اى حاجة تفردى عليها الفطير .
هاتى كورة ورشى عليها شوية زيت وافرديها بايدك وبعد كده شدى اطراف العجينة وافرديها لحد ما الفطير يبقى شفاف ادهنى بالسمنة أو الزبدة ولمى الأطراف وادهنى كل ما تلمى طرف ادهنى لحد ما تجمعى كل الأطراف هتلميها على شكل كورة حطيها فى صينية مدهونة سمنة وسبيها تريح وكررى نفس الطريقة ما باقى العجين وهاتى اول واحدة بططيها بايدك وحطى على الوش قشطة ودخليها فرن ساخن على اعلى درجة علشان الفطير مينشفش
بعد ما يتحمر طلعيه وحطيه فى حلة ورشى عليه شوية ميه علشان يبقى طرى خلصى كل الكمية وممكن لما يبرد تحطى كل فطيرة فى كيس وتدخليه الفريزر وتطلعيه فى اى وقت يسخن فى الفرن شوية.
قدميه مع الجبنة القديمة والعسل والقشطة وبألف هنا على قلوبكم.
التعليقات الأخيرة