- الاثنين، ١٤ يوليو ٢٠٢٥
- إتصل بنا
متابعة - صفاء مكرم
الشيف حنان يوسف ، ام معيلة من محافظة الجيزة ، سوف يتم تكريمها من مبادرة بداية جديدة للتأهيل النفسى للمطلقة وابنائها ودعم المرأة المعيلة باحتفالية يوم المرأة المعيلة للسنة السادسة فى خلال شهر مارس
الشيف حنان يوسف ، ام معيلة من محافظة الجيزة ، تروى لنا قصتها وتقول :
بسم الله الرحمن الرحيم اللهم صلى وسلم وبارك على سيدنا محمد اللهمم آتنا فى الدنيا حسنه وفى الاخرة حسنه وقنا عذاب النار... معاكم حنان السيد بدر الملقبه على السوشيال ميديا او فى شغلى بالشيف حنان يوسف ...
كنت زوجه للمرحوم حسن هاشم الموظف بالتربيه والتعليم بدرجة مدير قسم مشتريات ومخازن فى الادارة التعليميه .. كان راجل خدوم قووووى لمصالح الناس ومحترم وعارف ربنا جدا وكان يتميز بحبه لبيته واولاده وزوجته كان بينى وبينه 10 سنين كان بيحبنى قوى وانا كمان كنت بحسه اخويا وجوزى وابويا وكمان ابنى الكبير كنت بتعامل على ان عندى اربع اولاد بنت و3 اولاد .. رحيله فرق فى حياتنا كتير كان مخلينا فى مستوى معيشه عالى مرفهين يعنى ومكانش حارمنا من حاجه لو طلبنا لبن العصفور الله يرحمك ياحبيبى ويغفرلك اه معلش نسيت احكى قصتى كانا بتعامل لغاية دلوقتى انه عايش مماتش معانا فى كل لحظه ..
من 4سنين ونص كنت ست بيت زى اى ست بيت همى كله بيتى واولادى وجوزى من تربيه لمذاكره لخدمة بيتى واولادى ..
بشهادة زوجى كنت ست بيت شاطره والحمدلله كنت زوجه شاطره وناجحه بعرف احتوى جوزى وكل الظروف اللى ممكن تعدى على اى بيت حتى لو اجى على نفسى ماهو مش عيب انك تكونى سند لبيتك واولادك وجوزك كنا عايشين حياتنا ولاولادنا وبس انا وهو وكان زى الفل صحه وضحك وعايشها ببساطه فجأه تعب من قلب لغسيل كلية لمياه على الرئه... كل ده ف 4 شهور بس كل اللى معانا صرفناه لغاية مابقا يروح فى غيبوبه والحاله بتكون اصعب وانا اربع شهور مابين دكاتره ومستشفيات ورعاية واولادى وامتحاناتهم بنتى واولادى الاتنين وكانت رجلى من كتر مابروح اربع مرات فى اليوم المستشفى وبيتى بتورم وتبقا اد رجل الفيل واقاوم ماهو السند بيروح منى ...
لغاية ماتوفى رحمة الله عليه فجأه لاقيت نفسى لوحدى طبعا ربنا موجود وهو السند بس كان اختبار انا واولادى لوحدنا من غير (حسن ) وقررت اكتر ماقعد ابكى قعدت افكر فى انى اقف على رجلى علشان اولادى مين هايصرف ومين هيراعى انا خارجه من مرضه مافيش جنيه فى بيتى ولا فى حياتى.. ومحدش بيقف مع حد كل واحد عنده اللى مكفيه واللى هايقف النهارده مش هايقف بكرة .. طيب وبعدين كنت حريصة انى احافظ على اولادى وخصوصا ان اصغرهم كان فى اولى اعدادى .وبنتى اللى لازم احتويها لانها كانت مرتطبه بابوها جدا اخدت اسبوع طيب انا اعمل ايه طيب اشتغل ايه
حد من اصحابى اقترحوا عليا فكرة الكاترينج قالولى انتى شاطره فى المطبخ اعملى اكل وبيعيه.. بالفعل بدأت وعملت صفحه على الفيس وبدأت اصور اى اكل اطبخه وانزله على الصفحه واشيره مكنتش عارفه اعمل اسعار بقيت ادخل على الصفحات واشوف واحاول اقلدهم ... دخلت واشتركت فى جمعيه خاصه بالطهاه اتعرفت على شيفات كتير وبدأت اتعلم منهم حاجات تانيه غير الأكل زى ازاى ازين الطبق.. ازاى اغلف الاكاو.. بقيت ادخل على اليوتيوب واتعلم ازاى اسعر المنتج.. وازاى اغلف وازاى اوصل للعميل وبقا عندى كاترينج باسم (طشة حنان) واتعرف وبقا عندى زباين الحمد لله .
وفضلت افكر طيب ماهو الشغل ده رزقه مش ثابت وانا عايزة دخل ثابت عندى ايجار وميه ونور وغاز ومصاريف بيت واولادى اللى فى الجامعه واللى فى اعدادى وبنتى اللى المفروض اجهزها واكل وشرب .. من هنا قررت انزل اشتغل فى مطعم نزلت مساعد شيف ومن مطعم لمطعم وكنت لازم كل مطعم اشتغل فيه او اخرج منه لازم اكون خارجه باضافه تضيف لشغلى واحضر ايفنتات وكورسات مجانيه جمب ده كله عيشت اوقات صعبه ونريعه ايام كانت بتمر عليا مافيش فلوس ولادى الحمدلله عشان ابوهم شبعهم كانوراضين باى حاجه وكانوا سند ليا وعمرهم مااتنمروا على الظروف لانهم شايفن مش مقصره جه عليا اوقات كنت حرفيا بدين عشان اصرف واسد وادين وبعد سنه من وفاة زوجى بنتى جالها عريس دكتور ووافقت عليه شخصيه محترمه وابن ناس طيبين قلت وماله استر بنتى مع راجل محترم يكون لها العزوه والسند لاقيت فيه كتير من ابوها مبادئه واخلاقه وتربيته الله يباركله
بنتى اتخطبطت عملتلها احلى خطوبه عندى فى البيت ماهى بنتى اتحرمت من ابوها ولو كان عايش كان عملها البدع وغير انها اختى وصحبتى مش بس بنتى اتخطبت سنه والله ماكان معايا جنيه حاربت وشقيت وكنت بشتغل 16 ساعه عشان اجهزها كان ابوها عايش واكتر عشان لو عايش انا عارفه كان هايعمل ايه واديانت وجوزت بنتى احسن جوازه وعريسها عملها احسن واكبر فرح.. فرح قلبى وقلبها ربنا يفرح قلبه وعدت سنه وبقا عندى( ادم) نن عينى ابن بنتى حفيدى وعوض صبرى اربع شهور دلوقتى . عندى ابنى الكبير دلوقتى بيشتغل وابنى الصغير فى اولى جامعه هى الرساله كدة خلصت؟؟
لا والله لسه الطريق طويل عندى مسؤوليات ولادى الشباب لازم اكون فى ضهرهم يخلصوا جامعاتهم ومش معنى انهم فى الجامعه ابقا شيلت ايدى لا والله لسه محتاجنى اقف فى ضهرهم يخلصوا ويشتغلوا ويثبتوا نفسهم ويعملوا بيوت ويتجوزوا واشيل كمان عيالهم واعيش حياه تانيه مع احفادى يارب .
نسيت اقولكم انا دلوقتى بقيت شيف عمومى اشتغلت فى مطاعم كتير واتعلمت واشتغلت على نفسى وكبرت فى شغلى بقيت شيف انترناشونال وبشارك فى عمل المنيو والريسبيهات وافتتاح المطاعم وبقا عندى كارنيه وشهادة مزاولة المهنه وبامتياز يعنى بقيت شيف رسمى نظمى لسه شويه عندى لسه مسؤوليات والتزامات بشتغل 12 ساعه عشان تكفى بيتى واولادى ونفسى وخصوصا اننا فى زمن صعب صعب ربنا هو سندى كنت حريصه على انى احافظ على اولادى ومستواهم الاجتماعي زى ما والدهم كان معيشهم وربنا يقدرنى ..
حلم حياتى نفسى يكون عندى اكبر شركة كاترينج .. ونفسى اكون نموذج مشرف ومثل وقدوه محفزة لكل ست شايله شيله وبقول لكل ست معيله اوعى تيأسى واشتغلى واجمدى اقعى وقومى بصى لاولادك واوعى تتخلى او تيأسى .
اه نسيت اقولكم انى كمان بكتب كتاب قصص قصيره بحكى فيها عن نماذج من الستات المعيله بدعى ربنا يقدرنى واسعد اولادى واحفادى . انا الشيف حنان يوسف
التعليقات الأخيرة