- الأحد، ١٥ مارس ٢٠٢٦
- إتصل بنا
أمانى حمد الله ام معيلة من محافظة القاهرة سوف يتم تكريمها من مبادرة بداية جديدة للتأهيل النفسى للمطلقة وابنائها ودعم المرأة المعيلة باحتفالية يوم المرأة المعيلة للسنة السادسة فى خلال شهر مارس أمانى حمد الله ام معيلة من محافظة القاهرة ، تروى لنا قصتها وتقول : بفضل ربى عليا أنا أم لطفلين من ذوى الهمم اول طفل عمره 13سنه حالته تأخر ذهنى بسيط بسبب نقص الاكسجين وقت الولادة.. انفصلت عن والده وعمره سنه وللاسف ميعرفوش ولا بيشوفه كنت ما بين شغلى وجلسات ابنى ومحاولات دخول المدرسة اللى كانت كتير بتفشل لأن مدارس كتير بترفض. بس انا طبعا مكنتش بستسلم حاولت كتير و الحمد لله هو دلوقتى فى الصف الاول الاعدادي دمج فى مدرسه حكوميه بفضل الله فى تحسن لانه طبعا مستمر فى الجلسات .. تزوجت للمرة الثانية من شخص آخر وانجبت منه طفلة ومن اول يوم ولادة ابتديت رحلة حياتى الجديدة بنتى مولودة بمرض نادر اسمه الصلب المشقوق Spina Bifida ده مرض نادر فى النخاع الشوكي عدم اكتمال فقرات العمود الفقرى عملت عمليات كتير من اول شهر من ولادتها فى المخ والنخاع الشوكى والمثانة الحمد لله من اول الحاجات اللى اتنازلت عنها شغلى وكل حاجة ممكن تعوق مسيرتى مع بنتى مستسلمتش طبعا أنا اتمنيت بنوتة ربى رزقنى غاليتى ومؤنستى ورضيت بيها زى ما هى كان فى آراء كتير ومنهم والدها اللى يقولى سيبيها لحد ما ربنا ياخد وديعته واللى يقولى استحملى وكتييييييير كانوا واقفين معايا وفى ظهرى والحمد لله أنا مياستش وابتديت تانى رحلة مع العلم انى انفصلت عن باباها بسبب الضغوط النفسية وعدم تحمل المسؤولية.. الحمد لله على كل حال أصبحت ام لطفلين ذوى همم بدون اب لولادى او زوج يتحمل معايا المسؤوليه بنتى بتعمل علاج طبيعى من عمر 9 شهور عمرها دلوقتى 6 سنين متابعة مستمرة مع تخصصات مختلفة عظام وجراحة مخ واعصاب ومسالك وكلى وغيرها من التخصصات عملت 11عمليه من بدايه عمر شهر مع كل عمليه بنتى كانت بتعملها كان طمعى فى كرم ربى كبير كانت بتخرج من كل عمليه اللهم لك الحمد والعمليه اللهم بارك بتنجح دائما بدعمها هى مش حاسة باى نقص عندها بالعكس هى شايفاه نفسها متميزة محبوبة جدا واجتماعية دائما بدخلها مسابقات وبتفوز وبتتكرم الحمد لله ولادى فى تحسن ربى دائما بيطبطب عليا لأن الرضا اهم حاجة لازم تكون موجودة فى حياتنا ربى رزقنى الابتلاء ورضيت بقضائه ولسه مكملة المشوار بيهم وليهم وعمرى ما ندمت على حاجة كان لازم اعملها ومعملتهاش عشانهم .. بالعكس أنا عايشه عشانهم ولادى ابطال وانا بطلة بيهم ادعولى اقدر اكمل بيهم لنهاية مشوارى عشان اقدر اقابل ربى واقوله بفضلك وكرمك عليا قدرت احافظ على الأمانة اللى رزقتنى بيها نسيت اقولكم انى ام بطلة الكرسى المتحرك اللى بقى فرد فى عيلتنا الصغيرة وكمان موديل فاشون من ذوى الهمم وولادى ابطال فى فرقة الابداع الفنى لذوى القدرات الخاصة وكمان عايزة اقول حبوا حياتكم اللى الله سبحانه وتعالى رزقكم بيها لأن اكرم منه مفيش ودعواتكم ليا ولاولادى بالشفاء وعلى فكرة كل ام بطلة مع ولادها مش شرط يكونوا ذوى همم ممكن يكونوا نورمال بس الام بطلة فى كل الحالات ولادى ابطال حياتى
التعليقات الأخيرة